خدماتنا

كل اللي يحتاجه مشروعك، في مكان واحد.

ابدأ من وضعك أنت. لقيت روحك في وحدة من هالحالات؟ هذا اللي نقدروا نبنوه لك.

مواقع الشركات والأعمال

لو وضعك هكي

موقعك قديم أو مش موجود أصلاً، وفريقك ما يقدرش يحدثه، والناس تدور عليك وما تلقاش شي واضح.

نبنولك

موقع مرتب بالعربي والإنجليزي، يعرّف بيك كما يجب، وتقدر تحدثه بروحك.

وفيه مثلاً
  • عربي وإنجليزي
  • يطلع في قوقل
  • نموذج طلبات وتواصل
  • يخدم على الموبايل والكمبيوتر

المتاجر الإلكترونية

لو وضعك هكي

تبيع على فيسبوك وإنستغرام وواتساب. الطلبات ضايعة بين المحادثات، والمخزون في راسك، والتوصيل في دفتر.

نبنولك

متجر ولوحة طلبات تخلي كل طلب في مكان واحد، من لحظة الشراء لين يوصل للزبون.

وفيه مثلاً
  • كتالوج منتجات
  • متابعة حالة كل طلب
  • مناطق وأسعار التوصيل
  • الدفع عند الاستلام

منصات الدورات والتعليم

لو وضعك هكي

عندك دورات أو محتوى تعليمي، وتبعته توا في قروبات وروابط تتنقل بين الناس بلا ضابط.

نبنولك

منصة باسمك بحسابات للطلبة واشتراكات، تصعّب نسخ دروسك وتداولها.

وفيه مثلاً
  • دروس فيديو محمية
  • حسابات للطلبة
  • اختبارات وشهادات
  • متابعة تقدم الطلبة

أنظمة إدارة الشركات

لو وضعك هكي

شغلك ماشي بالدفاتر وملفات Excel. الأرقام متفرقة، وما تعرفش وضع مخزونك أو ديونك إلا بعد ما تجمعها بيدك.

نبنولك

نظام مبني على طريقة شغلك، يجمع كل شي ويعطيك صورة واضحة كل يوم.

وفيه مثلاً
  • مبيعات ومشتريات
  • مخزون وفواتير
  • صلاحيات للموظفين
  • تقارير واضحة

مشروعك الرقمي من الصفر

لو وضعك هكي

الفكرة واضحة في راسك، لكن ما تعرفش قداش تكلف، ولا شن تبني أول، ولا كيف تتأكد إن الناس تبيها.

نبنولك

نسخة أولى صغيرة وحقيقية، تجربها مع زباين فعليين قبل ما تكبر المصاريف.

وفيه مثلاً
  • ترتيب الفكرة
  • نموذج أولي تجربه
  • نسخة أولى حقيقية
  • خطة للتوسع

تطوير نظامك الحالي

لو وضعك هكي

عندك نظام يخدم، لكنه يثقل كل ما زاد الشغل، أو كل تعديل فيه يخوف، أو تبيه يتربط مع حاجات ثانية.

نبنولك

نراجعوه معاك، ونحسنوه خطوة خطوة بدون ما نوقفوا شغلك.

وفيه مثلاً
  • مراجعة شاملة
  • تحسين السرعة
  • الربط مع أنظمة ثانية
  • متابعة مستمرة

نصمموا لسوقنا

نبنوا للواقع اللي نعيشوا فيه.

  • الدفع

    الدفع عند الاستلام جاهز من الأول. وسداد وتداول والبطاقات المحلية نشوفوا معاك شن متاح لنشاطك ونضيفوه.

  • الإنترنت

    مش كل الناس على نت قوي. لهذا صفحاتنا خفيفة، واللي يكتبه الزبون ما يضيعش لو طاح النت.

  • اللغة

    العربية عندنا مش ترجمة في الآخر. الخطوط والاتجاه والبحث كلها مصممة بالعربي من البداية.

  • التوصيل

    كل مدينة وكل شركة توصيل ليها وضعها، فالمناطق والأسعار تضبطهم أنت من لوحة التحكم.

مش عارف شن تحتاج بالضبط؟

عادي، مش مطلوب منك تعرف. احكيلنا شن تبي توصله ونلقوا الطريق مع بعض.

احكيلنا عن فكرتك